Opruum - Foto: Ton S
Foto: Ton S

Opruum

LEMELERVED – Um ruumte te kriegn muj opruum. Iederiene zal mangs mun opruum, umdei de ruumte neudig hebt veur andere spuln. Dan kommie derachter dei eigenluk te weinig ruumte hebt um al oen rommel weg te pakken. Ai dan ant opruum bint kommie vaake wat teegn waorvan ie helemaol nie meer wussen dei ut nog han liggen.

 

Ok wurter spul efun, waorvan ie oe ofvraog wat ai der in godsnaam nog mee anmut. Ok kant ween dej op det moment ut gewoon rommel vindt en tiet um ut weg te gooien. Later kuj oe zelf wel veur de kop slaon umdet ie dan pas in de gaten kriegt det ut toch un bonke geld weerd was waj daor wegge gooit hebt. Ie ziet wel meer det spuln noe gin bal weerd bint en later hebt ze der grof geld veur aover.
Det nuumt ze dan det ut dan mode is en der is vraog nor. Ai ant opruum bint kiek ie niet zo nauw of muj juust nie zo nauw kieken anders kump der van opruum niks trechte. Ut maak ok un bult uut waor ai ens woont. Ast um oe hen in de buurte ok allemaol niet zo netties opperuumt is , kump ut niet zo nauw ast bie oe ok un grote bende is. Ie kunt ait nog zegn dei oe anpast an de buurte. Mar as de andere huuzen allemaol netties opperuumt bint dan val ie wel op ast bie oe un machtige teringzooi is. Dan gaot ze zich a gauw ofvraogn hoe iemand zo kan woon in die bende. Tis zo det de iene zich prettig veult in un mooi opgeruumde omgeving, mar der bint der ok zat die ut allemaol gin zak interesseert hoe ze woont en de tiet der nie veur nemt te gaon opruumn. Vaake weet ze zelf precies waor of wat ligt tussen die teringzooi. Mangs muj gewoon eem deurpakken en alleen mar denken dei zo mooi meer ruumte kriegt ai van al die pruttel of bint. Tis wel zo hoe langer ait laot lign, dan wurd ut vanzelf antiek. De liefhebbers daor veur hebter ok wat veur aover um oe der van of te helpen. Mar um noe in de rommel te bliem zitten en wachten tut det iemand oe giet betaaln um der of te kom, dan muj un bonke geduld en ruumte hem. En ruumte krieg deur op te ruum. Dus dan muj oezelf ofvraogn wat ai ut eerste of ut leste mun doen.
Ton

Artikel delen: