Maote haolen - Foto: Ton S
Foto: Ton S

Maote haolen

LEMELERVELD – Koffie drinken hef te maakn met hoeit doet. Tis ait un heel gedoe, want dan ist te weinig en dan ist teveule.
Ai bosschoppen gaot doen, kommie wellis in un winkel an de toonbanke. Ai dan wat besteld det ze nog mut ofsnieden, dan vraogt ze oe meestal ofut ok ietsie meer mag ween. Ie wult nie meuluk doen en vindt a gauw goed.

 

Der bint mensen die wult graag un bettie maote haolen. Nem noe is ut koffiedrinken. Die luu hebt liever un maotscheppie bie ut koffiezetten. As det scheppie dan weg is, dan bint ze kats vant rabat. Noe weet ze niet meer aster teveule of te weinig filterkoffie inkump. En dan kriej koffie die niet meer te zoepen is en dan kump der minder koffievolk. Dus ut maotscheppie is wel belangriek. Ut ding kan nie loopn, dus ut mut ens ween. Ik wol wel helpen zuukn, want ak door veur de koffie komme mut wel te zoepen ween. Ik pak de koffiebusse die bienao vol zat met filterkoffie en begin door in te wroeten . Zoals ik a dagge zat ut scheppie gewoon onderin. Ut mense waor ik ware, sprung un gat in de lucht umdet zie heur maotscheppie weer terugge had.

Aster dan koffie is ezet kuj kiezen watter nog meer inmut. Der bint van melkcuppies waor dan zo’n lippie anzit. Met det lippie kuj em losscheuren, mar as det lippie afknapt hej un probleem. Hoe krieg ie det ding noe lus? Ie pakt un scheere en knipt der un stuk of, mar noe kump de melk overal mar bienao nie in de koffie. Ut kan zelfs op oen kleern ekom ween. Dan muj oe ok nog weer ummekleedn, alleen mar umdej koffie woln drinken.

Maote haolen is verstandig en daor zoln meer mensen an mun doen. Ai noe kiekt naor die regeringsluu, die ruum de tiet nemt um un nieuw parlement in mekare te knooien. Bie ut uutdeeln van belastinggeld maagt ze ok wel maote haoln. Ast later kats nie op de goeie plaatse is ekom is det jammer emdet ut dan terugge mut kom. Mar hun bint ut maotscheppie ok kwiet.
Ton

Artikel delen: