Koffie zetten - Foto: Ton S
Foto: Ton S

Koffie zetten

LEMELERVELD – Un eem bie te kom en eem rustig an te doen kuj det mooi doen met un kuppie koffie. Daorveur hebt ze dan ok koffiepauze bedacht.Un vrouwe die mien leste stukkie elezen had, kreeg mie op de koffie en wol goed veurbereid de boel avaste klaor zetten. Zie speulen de kanne goed uut en deut de filterkoffie met un maotscheppie int filter.

 

Ze zette ut apparaat an en kwaamp bie oons in de woonkamer zitten umdet de keuken te klein was um door met zien allen te gon zitten. Wiele zaten daor met menare te praoten toen der nog iene binkwaamp. Die begon te bleern detter un hele plasse koffie op de vloere en ut aanrecht lag. Wat was der noe weer gebeurt? De vrouwe die eerder bezig was met koffie zetten, was kats vergetten um de kanne deronder te zetten. Dus de koffie leup overal hen en gelukkig kreeg ze gien kortsluuting, want dan wast helemaol un feest ewun. De deerne die net bin ekom was had un kind op de arm en gaf die gauw an de vrouwe bie wie zie op de koffie kwaamp. De deerne ging de boel gauw eem opruum en toen kon  de vrouwe weer nieuwe koffie zetten en noe met de kanne deronder. Toen de koffie gaar was kon wiele verder praoten over waor wiele mee bezig waarn. Wiele haan ut over etten.

Det is iets waor veule over epraot wurd. Ai alenig a ziet hoeveul van die kookprogramma der op de televisie bint. Soms niet echt over koken zelf, mar der stiet vake wel iemand der bie die met etten ant knooien is. In die echte kookprogramma’s hebt ze ut over watter allemaol in mut en hoeveel van dit of det derin mut. Ok vake hoe duur of tis en waor ait kunt haaln. Ok in supermarkten hebt ze al veurbereid spul wat alleen mar oppewarmt hoeft te wurn en ie kunt gelieke anvallen.  Ait over etten hebt kump der vake ok aandacht over afvallen bie. Allerlei adviseurs wult oe van alles ansmeern um mar af te kunnen vallen. Zie doet as of ze ut beste met oe veur hebt en assie via een lijdensweg un bettie minder weegt dan vindt ze det heel positief, mar hun portemonnaie dut nie an dieet en die wurdt alleen mar dikker.

Ton

Artikel delen: