In de boot enum - Foto: Ton S
Foto: Ton S

In de boot enum

LEMELERVELD – Assie as vrijwilligers oe inzet ist wel leuk um saam iets te gon doen. Der gink un koppel vrijwilligers, die allemaol ut zelfde werk doet, un daggie derop uut. Zie gin met un grote busse naor Giethoorn en wussen allemaol ut programma a via de mail. Onderweg wurn der flink geouwehoert en de grappen en grollen vleugn over en weer.

Wiele begon met koffie met appelgebak en iemand vund detter ok slagroom bie heurn en zol det wel een regeln.., mar kreeg det nie veur mekare. Volgens hem zol der anders nie genog slagroom overbliem veur ut ijsdessert dew later zoln kriegn. Um det wiele met un grote groep waarn, wurn wiele in tweëen deelt en wiele gin umste beurtend boogskieten en met un beutie op pad. Bie ut boogskieten vleugn de pielen int wilde weg en wie mossen oons an de regels hooln, anders kont gevaarluk wurn. Niemand die wol met de liekenwaagn weer op huus an. In de boot mos de stuurman eerst machtig wen ant varen met zo’n beutie. Twas un electrisch beutie zo hai gin last van kabaal. Ut leek eerst net un botsbeutie want der wun overal teegn anneknapt. Oonze chauffeur kreeg ut a rap onder de knie, mar die luu in de  boot achter oons an zaten bienao de ganse tied teegn de kaante en teegn andern an te knappen. Wiele haan un routepapiertie ekreegn en daor mossie mar bie ut eindpunt zien te kom. Natuurluk wol ieder ut eerste ankom en dan moszie probeern iemand in te haaln. Det kon allenig ai genog ruumte haan. Ok kwaam der wel twiefels ai un afslag eerder naam dei dan rapper biet eindpunt waarn. Dus wurn der stevig overlegt of die afslag nem of achter

de andern an. Ant ende kwaam wiele bienao tegelieke an. Wiele moggen naor un restaurant bie ut eindpunt waor un uitgebreid buffet ston te wachten en iederiene kon anvaln. Toen iederiene ut op had, gin wiele weer op huus an en kuj toch steln det  ut geslaagd was.

 

Ton

Artikel delen: