Druut met die bende - Foto: Ton S
Foto: Ton S

Druut met die bende

LEMELERVELD – Laatst was ik bie un vrouwe in de tuun, waor van die buxus in stond, die annefretten was en druut mos. Zie had un bulte andere planten in de veur- en achtertuun staon en hatter gin idee over hoe ut noe inne deelt mos wun. In de veurtuun had ze un zelfgemaakt perkie van stien met planties derin.

Det mog wel weg en die stien mochten wel nor de achtertuun waor zie die wel op kon stapelen. Sommige planten en struukn mogen der wel uut, want daor vond ze gin zak meer an. Die wol ze dan wegmietern en ai det dan allemaol in de gruune container wult proppen zol un heel gedoe wun. Gelukkig had zie un breur die met un anhanger die troep wel wol ophaaln. Wat hij dermee ging doen det blef un vraogteken.  Van un bure had zie un kruuwaagn eleent en die zat a rap tjokvol.  Noe kon zie die mooi truggebrengn en de buurman blij maakn met plantgoed wat zie overhad, anders most met de anhangwaagn mee. Kiek ai veurt milieu wat wult doen kuj zo ok nog recyculen. Of die buurman daor blij mee zol ween det vraog ik mie of. Ik vraoge ut mense hoe zie ut noe wul hem, mar det wus zie nie precies. Ik heb heur toen veure stelt um de bende druut te gooien en dan bekieken watter weer inkon. Dan koi metiene zien watter un bettie bie menare past. Zo kwam der ok wat ruumte ai der later nog wat bie in woln potten. Ik kon zelf begin in te potten mar tis haar tuun en ut mut nie zo ween dek later weer mut kom umdet ut heur nie anstiet. Ut in planten is gebeurt in overleg en zie was ok kats tevrene hoet noe ewun was. En daor giet toch umme?

Ton

Artikel delen: