LEMELERVELD – Boeren hebt vee op stal um te melken. Ut vee lup overdag int land en aster tied veur is wurd ut vee bie huus ehaalt. Ut spul mut dan nor binnen en bie mien olders thus leupen ze dan de melkstal in. Daor was un gruppe en ant eind un gierkelder. Der lagen reusters overhen, mar bie de gierkelder lag der ein reuster un bettie lus, umdetter wat beton offebrokkelt was.

Boom de voerbak was un piepe waor assie de koeien an vast kon knuppen. De stal was noe vol en ut melken kon begin. De leste koe was aorig ant bolteren en deurum kwam ut losse reuster in de kelder trechte. De koe kwam zelf half in de kelder te hang. Um noe te veurkom det ut beest helemaol in de kelder zol valn, bink in de kelder gaon staon um ut beest teegn te hooln. De stront stond op knieheugte en det was veuls te weinig om der in te gon zwemmen een dus mocht die koe der niet in. Anders zoj weer gedoe kriegn met die luu van de dierenbescherming. Wie hebt met veul meuite de koe weer zo’n bettie op de plaaste kreegn, zodat ut reuster der weer onder  elegt  kon wurn. Wie mut ut biest toch mar zwemblaosies ummedoen int vervolg, anders zolle nog verzoepen.

Ton