LEMELERVELD – Kwaase bie iemand in de tuun ant helpen en der kwaam iemand bieloopn die vreug ok eem wol helpen int grusland. Daor wolle peerden in jaagn en deurum mos de afrastering nog veur mekare maakt wun. In det land haan de leste jaoren gin beeste meer eloopn. Noe mos der ok nog wat kom, zodet de peerden water kon zoepen.

Der was un huussie kurt bie en van daoruut lag der a un ondergrondse tyleenslange. Daor woln ze dan un drinkbakkie anmaakn. Der mos noe un paole kom waor as det waterbakkie an kon. Achter ut huussie was der wel un waslienepaol en die mog ik wel eem ophaaln. Ikke kieken achter ut huussie en daor ston twee waslienepaoln met de wasliene der nog an. Ik dache nog det die man wel veule veur die peerden over had um zien wasliene daorveur op te offeren. Allenig mar um ut drinkbakkie ant te knuppen. Ik begon a vaste um die beugels lus te dreien waor dr wasliene an zat.

Ientie hak lus en dach toch mar eem naovraogn of ut wel klopt det de wasliene sloopt mos wun. ” Bei gek die stieter net” kreek as antwoord. Wat bleek noe, hij bedoelde un waslienepaol die naost ut schuurtie lag. Tja bie mie is un waslienepaol un paol waor in wasliene an zit. En hij bedoelde un zelfde soort paol die hij der ok nog had lign. Asse mie noe  ezegt had det ut un liggende paol was dan hak de staonde paol met rust elaoten. Tis det de schroem in die hardholten paol der nie goed uutwoln en dek ut eem nao evraogt heb, anders hak de wasliene veur niks esloopt. Ik kon noe de goeie paol pakn en ut drinkbakkie deran vaste maakn, zodet de peerden kon zoepen. Ai nie goed weet watter bedoeld wurd, kuit better naovraogn anders kriej ok nog trammelant.

Ton