LEMELERVELD – Der bint van allerlei vraogn en sommige heur ie liever nie, mar det bint dan vraogn veur de gezelligheid  of um mar eem wat ezegd te hem. Zaos of ie nor de kapper bint ewes en ie kunt daorop zegn det ze in ieder geval nie blind ewun bint. Of de vraoge of ie ok weer wakker bint en daor kuj dan weer op zegn dei ant slaopwandeln bint.

Die vraogn bint dur alleen mar veur um un  gesprek te begin. Wai ok vaoke heurt det is:”Hoe ist?” Dan wult ze nie echt weetn hoet echt met oe giet, of ut mut de leste tiet merakel slecht met oe egaone ween. Tis meer un soort groet waj ok in vreemde talen ziet. De ander wul eem laoten heuren dette interesse in oe hef. Ai de ander allenig mar veurbie stoeft zonder wat te zegn, kump det wel erg kolt over. Iemand kan zich dan gaon ofvraogn weurum niemand nog  iets teegn hem zeg. Daor kunt dan weer negatieve gedachten bie kom en det wuj toch ok nie. Mangs vraog ie oezelf af of iemand nie wat anders hef te vraogn dan allenig mar van die stomme vraogn die nens op slaot.

Ai un goeie diepzinnige vraoge kriegt kan det tut un mooi gesprek voern. Met vraogn over en weer kommie an mooi an de praot. Ie mun ok nie vraogn nor de bekende weg, want dan wurt a gauw saai. Vraogn kunt ok te persoonlik wun en dan muj oppassen detter gin ruzie van kump.  Mar vraogn stiet nog altied  vrij en vraogn hoet met iemand giet, daor kunt ze alle kanten mee op.

Ton