LEMELERVELD – Fietsen kan machtig mooi ween. Aj echter af en toe onderuut gaot met spul dan wurd aans. Ai ewent bint an un achteruuttrraprem,  muj wel eem wen an un handrem. Ant  stuur is links veur de achterrem en rechts veur ut veurwiel. Ai rechtshandig bint en ie hebt mans wat in de hande terwijl ie ant fietsen bint zoas post, dan hebbie die post  vake  in de linkerhand umdej oen rechterhand ant stuur wult hooln.

Ai dan plots mut rem dan kniep ie de rechterkante van de rem in en die is vant veurwiel. Det kan oe dan opbreken umdej dan onderuut kunt zeilen. Tis deurum better um oe ant te wen um de linkerhand ant stuur te hooln zodet ie ok links gaot remn.  Ie kunt ok veurkom dej onderuut gaot en dan muj zijwielegies dran knooien of ie mut oen snelheid anpassen. Ie kunt ok zurgen dej niet met andere zaken bezig bint. Um de aandacht  biet fietsen zelf te hem en better op de weg veur oe te kieken, kan al un bult helpen. Der bint echter ok dinge die nie an oe zelf ligt zoas leegstaonde zunne waordeur ie gin zak meer ziet, dichte mist zodej niet verre genog veur oe uut kunt kieken. Harde reegn, waordeur ut glad kan wun en dej dan ok veel water in de oogn kriegt, zodet net lek ai zit te lipn achter ut stuur. Ie kunt dan wel de boel minder goed bekieken. Assie netties rechts op de weg ried, kant gebeurn dej net naost de weg in de berm trechte komt en ai dan weer de weg opwult stuurn, kuj un zwabber gon maakn en onderuut zeiln. Assie dan umme sodemietert kuj oen handen gebruukn um oezelf op te vang. Mar assie dan ok nog iets in de handen hebt, kant gebeurn dej met oen bakkes hard in aanraking komt met het wegdek. As dan de schade erg meevult, hebbie toch weer eem eleert dej int vervolg nie meer zo stom mut ween um met de handen vol en ok nog bie pokkeweer  rond te gaon fietsen. En bedenk mar weer det haostige spoed zelden goed is, allenig hej der weer iets van eleert.

Ton