LEMELERVELD – Mangs help ik un imker die veur de aorigheid bijen hef. Hij ister mee oppegruut en deurum dutte ut nog steeds. Hij had un veuraod raamn in kisten staon en det waarn gin echte raamn, aans mosse de glazennwasser ok nog der bie slepn.

Dit waarn holten rekkies met draoden derin en daor kump zo’n vel met kunst raat in waor as de bijen raten opmaakt met honing en um die uut die raamn te halen, mossen die eslingert wun. Veurdet det kan, muj un bult ander werk doen, aans wurdt nie wat. Veural wermte is belangriek aans wul de honing nie goed loopn en krieg ie ut niet in de emmer onderan ut slingerapparaat. Die ramen zit vol met raten en as die vol bint slut de bij die of met was. Die was mut der eerst of en dan gaot de ramen nor un apparaat met pennen die in de raten gaot um de honing soepel te maakn. Dan gaot ze in ut slingerapparaat, det giet slingeren, zodet de honing druut vlug en via un kraantie onderan in un emmer kump. Vanuut die emmer kuj dan putties vuln.h