Zo komt ze de winter deur - Foto: Ton S
Foto: Ton S

Zo komt ze de winter deur

LEMELERVELD – Bie de bijenboer mos ik weer eem helpen en dan kommie van alles teegn. Nao ut honingslingern mos det spul schonemaakt wurn. Det giet aorig simpel, dus zonder zepe of ander schoonmaakgerei. Allenig mar un burstel en un emmer water. Daor kuj t spul mee ofburstelen en dan kant nor binnen um te dreugen. Dan kant bliem staon tut volgend jaor. Noe waarn de bijenkassen an de beurte.

In die kassen hangt de raamn en daor boomop lig un stuk tapijt.  Ze haan  nie genog tapijttegels uut de woonkamer mee enum, want niet in alle kassen lag tapijt. Onder det stuk tapijt mos un lattie um de bijen ruumte te geem as die wult gon fretten. Op ut tapijt kwaam un olde kraante en die waarn allebeide veur de warmte bedoeld. Daor weer boomop kump dan un bakkie met suukerwater. Det is dan ut wintervoer veur de bijen. As al die kassen langs egone bint, mossen de kassen better bie menare kom, zodet der later platen overhen elegt kon wurn. Die kassen staot op balken en ie kunt ut snelst de boel nor mekare toeschoem. As det nie wul dan muj de kas oppakn en zachies verplaatsen. As die bijen deurkriegt detter eslept wurd met hun dan wult ze eem nor buuten um det te bekieken. En as die bijen rond gaotvliegn is det niet zo leuk, want ik hoeve niet esteuken te wun. De imker zei det assie esteuken wurd ut allenig mar gezond is. Bie de coronaprik bint der ok luu die niet esteuken wult wurn. Ik dache det die imker mooi praoten kan mar ik ging toch rap zo’n bijenpak andoen met un kappe opt heufd. Hij zelf had ok al un paar keer bijen um zich heen te vliegn en deut ok zo’n kappe op. Hij hatter un rookpiepe bie.

Foi die bijen hoeft zelf gin sjekkie te pieln, mar kunt zo a rookn. Deur die rook wurdt de bijen rustig en dan kuj eem de kas winterklaor maakn. Noe allenig nog platen derbie slepn, die ze der later op kunt legn en de boel is winterklaor.

Ton

Foto's 4
Zo komt ze de winter deur - Foto: Ton S
Foto: Ton S
Zo komt ze de winter deur - Foto: Ton S
Foto: Ton S
Zo komt ze de winter deur - Foto: Ton S
Foto: Ton S
Artikel delen: