Tis mooi ai nog wat hebt staon

LEMELERVELD – Bie un kerl waor ik a vaker ewest bin, vreug mie ok bie un muure kon invoegen. Ik zeie hem det ik ut wel ezene heb hoe det mut, mar ik kan allenig un bettie anklooien. Het gunk hier um un muure die teegn un verhoogde border anstund. Die muure was achterover ezakt en noe zaten der allemaol gaten in en wat van de stien waarn verscheuven.

Hij had un zakkie snelcement ekocht en daor mocht ik ut wel mee probeern. Later wolle nog wel meer koopn ast niet genog was. Op ut zakkie stond hoeveul water ie neudig haan, zodej dermee kon invoegen. Ik had gin maotbekkertie en deut un plumpe water in de emmer en gooien ut cement derbie in. Ik zage a rap detter veuls te veul water inzat en ut te dunne was. Dan mutter mar zand bie in en ik ginge op zeuk in de schure of ik wat kon vin. Nens gin zand, mar wel un olde zak met metselmortel. Die was a keihard ewun mar met ut poeren int midden konk toch nog wat los spul kriegn. Noe konk det bie de dunne snelcement doen en zo voegspecie maakn. Noe konk eindeluk begin met invoegn en toenk un stukkie done had, wok ut eem laoten keurn deur die kerl.  Volgens hem zagter goed uut en ik mogge bliem. Met die opsteker konk verder gon met invoegen tutdet de cement opwas. Noe konk later un keer weer kom um verder te gaon.

Ton

Artikel delen: