Un sluttel is wel handig

LEMELERVELD – Ik gunge met de vrouwe eem bosschoppen doen. Wiele haan un bonke tassen bie oons en noe kuj in de supermarkt ok zelfscannen. Dan kuj oen bosschoppen glieke in de tassen proppen en dan kuj die glieke in de auto laden ai klaor bint met bosschoppen doen. Wiele haan un bosschoppenbriefie met enum. Noe naam wiele un winkelkarregie en woln wiele begin, mar noe was mien vrouwe ut briefie kwiet, dus toch mar eem in de auto kieken.

 

En ja heur daor lag ut, want ut hatter gin zinne in um met oons bosschopen te gaon doen.  Mar ut mos toch eem gebeuren en mien vrouwe greep um bie de kladden en nam um mee. Toen wiele al un paar tassen  vol haan kwaam ut briefie trechte boomop un volle tasse en was op un gegeem moment aweer pleiten. Mien vrouwe ant zuukn ofter offe valn was ens in de winkel, mar nee heur. Dan mar verder uut heufd verder gaon met bosschoppen doen. Wiele waarn klaor en dachten alles te hem. Noe naor de auto um in te laden en toenk ut lege karregie wol terugge breng zag ik det ut karregie helemail nog niet leug was  en gunge terugge nor de auto um mien vrouwe te zegn detter nog wat in ut karregie lag. Mien vrouwe kieken en daor lag ut bosschoppenbriefie. Wiele waarn noe toch hier en dus kon wiele metiene un koppie koffie gaon drinken en dan metiene bekieken op ut briefie of wiele alle bosschoppen haan.  Na de koffie woln wiele op huus an, mar mien vrouwe kon de autosluttel nie vin. Alle zakn bekeken mar niks, dan toch mar eem kieken bie ut koffiepunt waor wiele ezeten haan. Nou dao ok niks, dus dan mar nor de supermarkt um nao te vraogn of iemand ze daor evun had. Ok daor nie, dus dan mar kieken in de tassen. De achterkleppe van de auto wul allenig mar los met de sluttel en gelukkig waster un portier open. Noe kon wiele de achterbanke ummeklappen, zodei bie de tassen komt. Daor vun wiele gelukkig  de sluttel die an un handgreep was bliem hang.  Aans haan wiele naor huus mun loopn um de reservesluttel op te haaln. Tja ai wat verliest muj oe weetn an te passen.

Ton

Artikel delen: