LEMELERVELD – Noe met al det blad in de tuun of um ut huus, hei un bonke werk um ut allemaol op te ruum. Ie kunt ut rap doen ai de boel de bos ingooit, mar assie nie wult dei later weer mut opruum umdet ut blad vanuut de bos weer terug eweit is. Dan kuj nie meer zien detter oppe ruumt is. Um dei noe hebt beslutten um ut blad weg te haaln, kuj alles wegharken en an un grote bult schoem en in de gruune container proppen.

Ai un klein tuuntie hebt en umme ut huus niet zo veul ruumte, kuj an die container genog hem. As die dan leug ehaalt wurd bij der mooi van af.  Mar assie un beste bult met blad hebt muj ut laoten lign as de container vol is en wachten tutdet de container weer leug is. Ie kunt ok un bladcontainer maakn en in overleg met de gemeente die laoten leughaaln. Dan kuj de bie mekare gekarkte bladeren met de kruuwaagn in de bladkorf kiepn.  Ai mazzel hebt kuj ok un schovel daorbie gebruukn en dan giet ut veul rapper.

As die der nie is kuj ok un aanhanger gebruukn en die dan vollaadn met blad. Tis welzo det as ut blad dreuge is, kujt minder goed laadn en zal der veul wegwein. Aster veul wind stiet dan kuj ok bienao nie goed meer un bladblaozer gebruukn, want dan vlug ut alle kanten op. Harken giet dan better en dan hei ok nie zo’n kabaal. As dan ok nog alle buurn blad gaot blaozen kriej un kabaal van jewelste. Assie un radio veur de arbeidsvitamines an hebt staon heurie daor niks meer van en dan bint oordoppen met muziek un goeie oplossing. As de boel der dan netties bieligt, krieg ie toch un opgeruumt geveul.

Ton.