Sinterklaostied - Foto: Ton S
Foto: Ton S

Sinterklaostied

LEMELERVELD – Un bettie laate, mar det maakt toch gin bal uut. Tis noe zo det sinterklaos minder populair is en det kump veural deur zien knecht de zwarte piet. Der bint van die luu die vind zien rol as knecht discriminerend. Umdette zwart is zol dan weer met slavernij te maakn hem. Ik vinne det un hoop gezever over iets wat gewoon un kinderfeessie is.

Noe schoeft  ze ut feessie vake deur nor de kerstdaagn en det is weer echt Amerikaans. Daor hebt ze via coca cola de kerstman bedacht en dan heurt daor kadeuggies bie, zoas wiele det doet bie sinterklaos. As de oldere kinder nog steeds sinterklaos viert komt der bie de kadeuggies ok un gedichie. Dan kuj anderen mooi onderuut haaln of onmeunig in de zeik nem. Ik heb is mee emaakt det bie un familie ze looties gin trekn en ut toeval wol det un vent zien eign vriendinnes lootie ekreegn had. Het gedichie det zien vriendinne toen mos veurleesn det stond vol met allerlei lofpriezingn. Die vriendinne mos noe iederiene laoten heurn wat un geweldige mazzel zie had um zo’n superknappe vriend te hem.  Zie mog God wel op de blote kniene danken det zie hem an de hake had kun slaon, want noe kon zie allenig mar un geweldige toekomst tegemoet  gaon.  Deur die looties muj mar afwachten waj veur kadeuggie ai kriegt. En as ut dan zo is dei oen eign vriendinne hebt op oen lootie dan kuj die un mooi en duur kadeuggie geem, zodet de anderen gaot denkn hoe det noe kan det zie zoiets moois ekreegn hef terwijl hun un goedkoop en simpel prullegie ekreegn hebt. Daor kan trammelant van kom en det zal de bedoeling niet ween. Dan kuj ut misschien toch better doorschoem nor de kerstdaagn. Dan muj juust laoten zien dei an vrede op aarde meedoet.

Ton

Artikel delen: