Ait mar bieholt

Ait mar bieholt

LEMELERVELD – In disse tied hef ut vee nie ait genog te vreten as ze nog buutn loopt. Der leupen un stuk of wat peerden int weiland. Zie leupen der al un schoffie en haan de boel al aorig glad. Noe mos ut spul nor un ander weiland waor ze wat te vreten haan. Deurum mos de afrastering daorvan eerst bekeken wun.

 

Ai det gaot doen weetie nie wat ai mee mut nem en ut liefst nemmie teveule mee, want ai te weinig bie oe hebt, muj biehaaln en det is toch zunde van de tied. Wiele woln met un auto langs de rikken rieden, aans solt allemaol veuls te lange gon duurn. Twas un stuk van 3 bunder. Um langs de rikken te loopn is nie zo erg, mar ai dan wat neudig bint, zoas un paole, dan muj hen en weer loopn um det op te haoln. En met un auto  waor ut spul in ligt, heit bie de hand. De afrastering leup mangs ok deur bossage hen en dan goi der van uut det de peerden daor niks te zuukn hebt en daor wel niet zult in loopn.

 

Het prikkeldraod leup dan wel deur die bossage mar de paoln waarn vake niet al te best meer. Wiele hebt ut draod deurum mangs hoger in de takken ehang en dan zoln de peerden der nie in gon loopn. Der leup ok un sloot in die bossage en dan zoln die peerden mooi kun zoepen, mar wie dachten nie det ze deur al die takken hen zoln kroepn um det te doen. Dus moster ok un waterbak int land biekomn. De peerden waarn al oldere peerden en dan verwachie gin rare toestanden zoas vake bie jongere peerden wel gebeurt. Jongere peerden bint meer ant bolteren en gaot wat uutprobeern.  Nao alles bekeken te hem, haan wiele de goeie hoop det ut zo wel kon. Ie mut ait de boel eem naoloopn veurdei de peerden der in jaagt, aans muj weer achter de peerden anvang.

Ton

 

Artikel delen: