Un paar logies derbie - Foto: Ton S
Foto: Ton S

Un paar logies derbie

LEMELERVELD – Ik heurde det un vrouwe un probleem had. Zie had un paar knien en zie mos un tietie nor ut ziekenhuus. Zie kon gin hulpe vraogn bie heur buurn. Zie vreug mie ok heur kon helpen bie det probleem. Zie dacht dek misschien wel bie iemand kon gaon schooieren of iemand un tietie heur knien wol verzurgen en dan dus in huus nem.

Ik vreuge gelieke an un kennis of die det wol doen, mar die wol ut wel un wekke mar langer nie. Mar as ut deur kon gaon mossen dee wel twee hokn komn, want ut bint twee knien en die kunt nie bie mekare in. Ut bint un ram en un moor en ai die bie mekare doet komter rap kleine knienties bie en door zit de vrouwe nie op te wachten. Ik heb die vrouwe beloofd dek ut probleem zol oplussen. Ik heb bie mien buurn al un binnenhok ereegeld en ken nog wel wat luu die ik kan vraogn of ze un hok over hebt. Ak dan twee hokn hebbe kank die bie mie int tuunhuussie wel neerzetten. Ik nam un paar tassen met ritssluuting mee um de knien in te vervoeren. Ut mut mie nie gebeurn det die knien  in de kofferbak gaot rondhupsen of nog erger det ze uut de kofferbak weet te kroepen. Dan kuj un paar knien teegkomn die staot te liften an de weg.  De vrouwe was aorig gek met heur knien en die tassen vund ze nie goed um ze in te vervoeren en dus had ze wel un paar kissies en aster dan un planke der boom op kwaamp en un touwgie derumme hen, dan kon det mooi. Ik mosse nog bie iemand un kippenhok schone maakn en daor ston ok nog un paar knienhokn. Zo hak de beide hokn bie mekare. Ik heb alle spuln mee enum um die knien te verzurgen. Noe gaot ze toch nog goed ut nieuwe jaor in.

Ton

Artikel delen: