Al die gaatn is ok nie wat

Al die gaatn is ok nie wat

LEMELERVELD – Zoas int Sterrebos binter meer zukke weegn. Niet ait bint det gemeenteweegn, dus dan muj zelf an de bak. Assie un weg vake gebruukt, wuj der ok graag makkeluk overhen gaon. Um ut oe zelf makkeluk te maakn kuj heel rustig rieden over det weggie en dan hej ok gin last van al die gaatn die op den duur in ut weggietie komt.

Want  det weggetie zal deur ut gebruuk mangs gaten kriegn. Ok zal deur regen der wat uut kun spuuln, zodet daor gaten van komt. Tis un weggetie van grint met zand en dan kumt det veur.  Noe kuj oe as autobestuurder goed vastehaol ant stuur aj deur mekare rammelt wurdt deur al die gaten in det weggetie. De luu die bie oe in de auto zit zult met de kop teegn ut plafond van de auto an knappen um dej weer veuls te veule haost hebt. Tja dan mut ze de gordel mar goed umme doen kuj dan as commentaar hem. Noe ister ok un andere oplussing. Ie kun zurgn dej die gaten gaot opvuln en dan hoef ie nie meer deur mekare rammelt te wurn. Dus un kruuwagen derbie en grint ens vandan haaln, zodej de gaten kunt opvuln. Ast allemaol edaone is kuj met plezier en in alle rust weer over det weggetie rieden, zonder det oen medepassagier int ziekenhuus trechte kump deur ut scheuren van oe over det weggetie vol met gaten.

Ton

Artikel delen: