Werken - Foto: Ingezonden foto
Foto: Ingezonden foto

Werken

LEMELERVELD – Um de kost te verdienen, muj werken. Tenminste ai nie allenig mar oen handen wult ophooln. Met al die sociale uutkeringen ist meugeluk um zo an oen geld te komn. Veur mie ist werken nie allenig um geld te verdienen, mar ok un nuttige tiedsbesteding. Ie staot midden in de maatschappij ok ai kats allenig thuus  werkt vanwege corona, heb ie toch te maakn met je baas. Die betaald oe tenslotte !

Ie zult allicht oen leem begin met ut leern tut dej wat kunt, um dan te gaon werken. Dan zuj jaoren lange oe te blubber werken. Assie zwaor lichameluk werk mun doen, kant veurkom det ast zoverre is dej maagt stoppen met werken dej kats versleten bint. Ai dan wult genieten van de rust nao al det zwaore werk kant zo mar ween dej daor gin levenstied meer veur kriegt umdet soms zomaar offe loopn kan ween. Ai biet werk allelennig mar achter in buro bezig ewest bint, kant gebeurn dej in un gat valt umdej niks meer hoeft te regeln of te vergaderen.

Iederiene deut ait un beroep op oe en zie haan oe overal bie neudig en noe kunt ze oe bliem vraogn. Ie mossen ait an iederiene denken en det hoeft nie meer. Ens mee deurgaon en bezig bliem is heel gezond en verstandig. Ie mun nie ut idee kriegn dej onmisbaar bint. Der bint nog un bult vrijwilligers neudig overal en het hoeft niks te maken te hem met oen olde werk. Iets kats anders doen kan un uutdaging ween en dan kuj nog iets anders leern. Deur bezig te bliem hollie regelmaot int leem.

Luu die niks anders te doen hebt as allenig maar bankzaken zult ut toch un keer zat wurn om allenig mar met de konte op de banke te hang. Op tied opstaon en ok in de avond op tied nor berre gaon gef structuur int leem. Zurgen dej un doel veur oogn hebt gef motivatie . Tjonge ik doe net ok verstand van zaken  hebbe, mar tis allenig mar hoe ik ut bekieke. Bie werken mut wel zo ween dej ut ok nog graag doet, zelfs ast minder goed betaald. Plezier hem deran is ok un bonke weerd. Tis ait better um terugge te kieken op un leuk arbeidsverleden.

Ton

Artikel delen: