Wat muk dermee? - Foto: Ton S
Foto: Ton S

Wat muk dermee?

LEMELERVELD – Der beln mie un kerl die un paar machtig mooie stoeln over had. Ik zei um dek wel eem kwaam kieken, mar ik heb zelf ut huus a vol staon. Dus eigenluk hakter kats gin belang bie, mar kieken dut gin zeer, dus…

Hij had de stoeln a buuten staon op zien terras en ut waarn van die luie stoeln.  Det is toch un rare name: luie stoel en ik denke det daormee bedoeld wurd det ai echt lui bint det zo’n stoel derbie past. Want hoe kan un stoel noe lui ween? Ut verzet gin poot. De beide stoeln van die kerl, waarn al aorig versleten en ok was de bekleding hier en daor kapot. Veur un handige harry kant un mooie uutdaging ween um ze weer mooi op te lappen en dan kuj der un paar mooie stoeln van kriegn. Die kerl zei mie ok nog det zien vrouwe en hij der iedere dag nog inne zeten hebt. Dus kuj der van uutgaon det der goed in kunt zitten.Vanwege de slijtage woln ze noe toch wat aans. Ik zei teegn hem det de kringloop det soort stoeln helemaol nie meer hem wul, want die kriegt noe a un bult aanbod en dan kunt ze kiezen wat ze wel of niet wult hem. Zoas die beide stoeln derbie staot dacht ik nie det ze der belang bie hebt. Ik gaf die kerl de tip um op weggeefhoek te probeern van zien stoeln of te kom en det iemand der nog wat in zut um ze op te haaln. Ik denke det ze toch op de vuilnisbelt trechte komt. Ik gao der nie mee ant leuren in ieder geval.

Ton

Artikel delen: