LEMELERVELD – Iets waj toch geregeld en vake zult mutten doen, det is afwassen. Ie kunt ok aans doen. Ai ut spul smerig hebt kujt wegsodemietern en dan wat nieuws koopn. Ie hoolt dan wel mooi variatie in oen uutzet. Ik bin echter bange det ut leem dan wel un bettie duur wurd. Ok kriegie dan ok nog un bonke afval.

An de andere kante kuj zurgen dej un hele grote uutzet hebt, want dan hoefie niet zo vake meer af te wassen. Ie hebt dan wel un hele bonke afwas tegelieke. Assie bie vremde mensen komt en daor gebruuk emaakt hebt van hun uutzet, kuj anbieden um bie hun de afwas te doen. Det is dan bedoeld as waardering ast gezellig ewes hef. Bie oen eign familie muj daor mee oppassen. Ie kunt ait anbieden en aij slim bint muj oe un bettie onhandig gedraagn. Iets ‘per ongeluk’ laoten kapot valn, heurter dan bie. Ie hebt dan kans det ze ut rap van oe overnemt en dej ut helemaol nie hoeft te doen. Ie kunt dan oen hande in onschuld wassen, want ie hebt ut tenslotte anne beuden ( dan heij toch nog wat te wassen). Ie mut natuurluk gelieke anbieden um wat nieuws te koopn en oe verontschuldigen dei zo onhandig bint.

Dan bei weer terugge bie ut eerdere alternatief dej wat nieuws gaot koopn ast smerig is. Iets heel aans is de afwasmachine. Det is un mooi apparaat mar niks is zo gezelig as saam af te gaon wassen of kapot gooien. Zo leer ie mekare goed ken. Ut mooiste is um metiene te gaon afwassen en nie wachten tutdet ut allemaol anne koekt us. Mar de wil um af te wassen is nie ait erg groot. Iniens mut ze neudig nor de plee en blieft daor hang tutdet de afwas edaone is. Of ze mut effenties naor buutn rookn.

Ton