LEMELERVELD – Sinds ik in dit huus wone, kwaamp dur ait un man met eerappels venten. Bie de veurige bewoners kwaampe ok ait. Die eerappels van hem bint niet al te duur en ie hebt ut gemak det ze oe an de deure ebracht wurd.  Ai is un keer nie bie huus bint, zette un zak met jappel veur de deure en betaaln kump later wel trechte.

Disse kerl woonde eerder op un boerderije en de jappel haalde hij uut de polder.  Bie de boederije hadde meestal un vracht van die jappel op veurraod. Ut jappelventen dutte noe un bettie as dagbesteding.  Eerst kwaampe met un trekker langs, mar noe heffe un autootie daorveur. Tis al un old kerltie en zo heffe mooi wat te doen. Mangs heffe ok wat gruunte in aanbieding. Hij tuft zo un bettie rond um al zien klante langs te gaon. Zelf tut in Zwolle an toe, waore vanuut vrogger nog klanten hef. Pasgeleden isse nor un bejaardenwoning verhuust, mar op de boederije woont nog familie. Vandeur heffe nog opslag veur zien jappel. Bie zien bejaardenwoning heffe wel un paar buurvrouwn waore mee kan gon teuten, mar hij giet toch liever op pad. Aim zo heurt wasse nooit un huusmusse, mar gink liever vort van huus. Hij snapt ut jonge volk ok nie die mar bie huus blieft plakken, want ai derop uut gaot is toch veul mooier.  Zo isse ut zelf ok ait ewent en dan muj det bliem doen zolange ast wul.

Ton