Kept al is edaone - Foto: Ton S
Foto: Ton S

Kept al is edaone

LEMELERVELD – Kwas laast bie un older echtpaar. De vrouwe vant koppel was a minder mobiel en zat deurum veul in un luie stoel. Heur man wol veur heur un bettere stoel met van die electrische apartigheden, zoas beweegbare voetsteunen en rugleuning. De vrouwe hef de stoel uut probeert, mar de stoel zat veur gin meter.

Dus moster wat anders kom. Ik mogge mee um de stoel umme te ruilen en ik kon dan helpen bie ut in en uutladen. De nieuwe stoel wurn in huus ezet en de vrouw mog um noe uutprobeern. Wiele ging an de koffie toen de vrouwe in de stoel ging zitten. Nou het passen mooi volgens de man. Ik fluusterde teegn hem dek nog gin commentaar van de vrouwe hadde heurt. De man zei det hij zich angstvallig stil heult umdette bange was det de stoel weer gigantisch offekraakt zol wun. Gewoon rap ens anders over begin te neulen.

De vrouwe vreug an heur man offe zo metiene eem wol helpen bie ut opvouwen van de wasse. Der lag un bult wasgoed en ik zei dek ok wel daormee wol helpen, dan kon de man verdan gaon met koffiezoepen. Volgens de man konk det helemaol nie en ik zei teegn hem dek ut zol laoten zien en ast nie goed was mog hij ut mie leern. Ik pakken metiene un laakn en gaf de vrouwe de iene kant en begon zelf an de andere kante te vouwen en ut gin gewoon goed. Eem goed strak trekken, zodet de knutters der uut gaot. Bie ut tweede laken gaf ik de man de ene kante in de handen en zei det hij noe an de beurte was, want allenig mar zitten te keuren daor wurd niemand blij van. Zo hebt wiele saam die bult wasgoed netties oppevouwen. Ie mun nie bange ween um wat uut te probeern. De ene zalt better doen as de ander, mar det maakt nie uut ast mar edaone wurd.

Ton

Artikel delen: