Ik vraoge mie wellus wat of

DALFSEN – LEMELERVELD – Ik kwaame lest biet gemeentehuus veur ut anvraogn van un paspoort. Ik leup nor de receptie um te vraog hoe det hier an toegiet daormee. Ik mos un pasfoto bie mie hem en ok un older paspoort  of un IDbewies ak die a hadde. Die receptiejuf hef un digitale afspraak veur mie emaakt veur un weke later um dezelfde tied zo’n bettie.

Ikke dus die weke later dur weer naortoe en komme bie diezelfde receptie die noe zei dek un nummertie mos hem veur de andere balie. Ikke nor det nummertiesapparaat, mar det deut helemaol nie. Laot ze mie weer met die olde rommel anklooien. Bie de betreffende balie stond gin mense en ik dache a waor hek det nummertie dan veur neudig. Mar ja regels bint regels dus de ambtenaren wijkt daor nie van of. Umdet ut apparaat noe gin nummertie wol geem, mogge ik noe toch nor die balie. Ut mense bie die balie schruk bienao toene mie zag en keek op ut horloge. “Tja u bent 20 minuten te laat voor uw afspraak, dus moet u een nieuwe afspraak maken ” kreek te heurn.

An mien gezichte te zien, straalde ik nogal verbazing en onbegrip uut. Misschien hef det uhulpen det de vrouwe mie toch wol helpen. Mar toen ze de pasfoto zag was die te old en mos ik un keer weer kom met un verse pasfoto. Dus toch weer un nieuwe afspraak maken en noe op tied komn. Ikke weer op huus an en wol via un parkeerplaatse de weg nor huus  oprieden.  Veur mie reed un bussie die ok de weg op wol, dus ikke derachter an.  Net veur de weg stopt det bussie en kump ineens achteruut riedend op mie an. Ik ramde op de toeter en wiele reden allebeide zachies, dus konk zelf ok weer achteruut um hem trugge te laoten rieden. Ik dache nog wel eem waor die kerl mee bezig was. Ik kon dur noe umme hen en op huus an.

Ton

Artikel delen: