DALSEN – Wat fijn det ut al weer Meert is! De winter is (wat veur winter, het was meer harfst!) eindelijk een bettie an het eindigen. Ik was – net as jullie neem ik an-, die storm en wind goed zat! Meert is begunnen en is altied een hele mooie moand veur meer aandacht veur het dialect. Want streektoal is belangriek en mag nooit uutstarven!

Ik hoape det schoel’n het onderwies in-en-oaver streektaal, ok nog veule meer goat oppak’n.

Het mooie is, det iedere streke zien eigen dialectwoorden hef en wie doar, zoas ikke, een bette acht op gef, die kan al goed heur’n det der zelfs tussen Dalsen en Ni-jluusen al een wereld van verschil in woord’n zit.

Detzelfde geld ok veur bieveurbeeld Dalsen en Roalte of Dalsen en Den Ham. Ie bint nog mar 20 kilometer van huus of, of ze proat al weer iets aans as bie oons. Mar gelukkig kunt wi-j mekare wah goed begriep’n.

Het mooie is wel det as ie, zoas ikke, op-evoed bint met dialect, ie det automatisch goat zien as oen moedertaal en det is ok logisch. Ok al proat ik wah Nederlands, dan nog denk ik in’t dialect.

En det is dus oen moedertaal; de taal woar as ie in denken. Mien buurman denkt det de moedertaal der is, umdet zien va toch niet an’t  woord kump, mar det is onzin natuurlijk.

Ik hoape det jullie net as ikke, disse moand weer enorm goat geniet’n van het dialect in het algemeen en van “Meert, dialectmoand” in het biezunder.

Wat jullie misschien niet eens weet’n is det der elke moandag-, dinsdag-, woensdag- en donderdagaovend van 19 uur tut 20 uur op RTVOOST,  Omroep Gelderland, RTV Drenthe en RTV Noord, een uur lang dialect muziek is te heur’n in het gezamelijke programma Alles Plat. Doar zit ok wel bands en artiest’n uut Dalfsen tussen, zo mangs. De muujte van het luuster’n weerdt.

Het is a weer tied en veur noe stop ik der met. En oaver tied gesprokk’n: ik vroage mie namelijk wel of, of het jullie wel iens is op-e-vall’n, det analoge, klokken, -wekkers, -horlogies, altied met de wiezers op circa 10 oaver 10 of-gebeeld stoan in reclames? Woarum niet op 10 veur 2? Of bieveurbeeld op 8 uur of 6 uur?

Ik hoape det een horlogie- of klokk’n reclamemaker, hier via Dalsennet antwoord op kan geev’n, want doar bin ik wel heel arg ni-jschierig noar, wat doar de reden van is.

Mensen; goed goan en wi-j sprekt mekare!

En ik hoape det een heleboel luu zelf ok stukkies in’t dialect goat schriev’n en opstuur’n noar Dalfsennet en bv noar kraant’n. Dan wurd “Meert dialectmoand” een groot succes!

Gegroet,
Hendrik van de Steege