DALSEN – Wi-j bint een paar joar geleden in oktober op vekaansie e’west noar Spanje. Doar is het tenminste een bettie mooi weer in de harfst en nog best weh warm. Umdet ik nogal gauw verkoalden binne in de harfst,  hef de dokter mi-j al is e’zegd det ik noar een warm laand mutte, want det hoest’n van oe, det kump deur det kolde en veural natte harfstweer. Ik zeg;  nou ,as det op oen of op het ziek’nfonds  kosten kan, dan goa ik der graag een keer hen!

Maar ja, zo warkt det natuurlijk niet helaas, en mosse wi-j op egen kosten en met het vliegtuug der hen. Det was trouwens völle makkelijker dan zelf helemoal met de auto der hen toer’n.  Man,  dan bi-j bek of a’j der bint. En nog erger: aj weer thuus bint, dan bin ie a weer an vekaansie toe deur die lange reize. Dus wi-j mooi met zien beiden vanaf Dusseldorf met het vliegtuug van zo’n priesvechter, noar Barcelona.

Het was enorm mooi doar en ie kriegt doar heel ander etten dan hier. Stampot boer’nkool heb ik doar niet e’zene, mar wat ze doar in de restaurants serveren was arg lakker allemoal. En dan oaverdag een bettie deur die stroaties hen kuir’n en winkelties kiek’n, det is toch geweldig mooi ja. Op een gegeven moment zeg mien vrouwe: woarum zeg ie toch steeds teeg’n iedere Spanjaard die a’j teeg’n komt “Muchos”’. Echt de hele dag deur zeg ie “Muchos” teeg’n die Spanjaarden, woarumme?? Ik zegge,  nou, det betekend namelijk heel völle veur ze.

Laatst hadden wie een feesie van de vrijwilligers. Wi-j mochten met een grote boot de rivier op en onderweg was der meziek en genog drink’n  an boord . Veural water ko’j zovölle krieg’n as det ie mar wollen. Det zit namelijk zo: zökke feessies probere wi-j altied zo goedkoop meugelijk veur de vri-jwilligers te organiseren. En der bint een boel bedrieven die wel graag spontaan een duit in’t zakkie willen doen, deurmiddel van sponsoring van materialen of geld. Want vri-jwilligerswerk vinden ze belangriek en det is ok zo! Het waterschap  hadd’n wi-j ok e’vroagd veur een bijdrage. Die gaven oons 7 vaten met water…

Mensen, dank de’w mekare weer  eem e-sprökken hebt (hoewel ik ut meeste an’t woord was). Goed goan en tut de volgende keer!

Hendrik van de Steege

PS: verget de gemeenteroads verkiezingen niet, want die bint ok al gauw. Vandoar natuurlijk det die roadsleed’n in’iens zo extra lief teeg’n mie doet .