LEMELERVELD – Der bint van die ding die iemand machtig dwars kunt gon zitn. Iemand die nie veule meer met maakt, kan iets hem det blef dwars zitn. Ut blef mar int heufd rondtoln. Ast dan nie gauw oppelust wurd blef ut vretten an iemand.

Ut kan un kleinigheid ween det steeds groter wurd bie iemand. Ik nemme un veurbeeld hierveur. Un leuge batterije van un horloge en dan denk ie: dan doei der toch rap un nieuwe in en klaor. Mar assie det zelf nie zo rap kunt, muj bliem wachten tut iemand det wul doen veur oe. As anderen dan niet in de gaatn hebt det iemand zich kapot ergert an zo’n klotenbatterije, kant lange duurn veurdet ut probleem is oppelust. Der bint ok mensen die zich opvret asse ziet hoe de krante is verandert. Eerder kon ze lekker de krante lezen met un koppie koffie durbie. Noe iniens is det kats verandert. Uut ergernis wult ze a bienao de koffie van tafel houwn, umdet de krante noe iniens bastens grote foto’s deein hef staon. Dan hoeft ze minder tekst te hem, mar ut leesn wurd deurumne nie zo leuk meer.

Ok binter van die luu die verzamelt hun afval goed gescheiden. Zie hebt dan zo’n bak veur ut plastic, mar ok hangter van die tassies veur ut plastic. De plasticbak stiet op maar un paar passen uut de buurte. Um de rappigheid hoeft die tassies nie mar misschien veurt gemak. Ik bekiek ut aans. Ie doet un paar stap nor die plastic bak en dan hej die tassies heel nie neudig. Ut giet mie te verre um glieke dan mar de plastic container bin te zetten. Det gef dan wel weer un oranjegevuul.

Ton