LEMELERVELD – Ik mogge eem iemand helpen um de gruuntetuun a vaste klaor te maakn. Der mos un bult ummespit wun en de gruunte die der nog stond mog weggegooit wun. Der mos een stroke grond achteran biet bouwland ummespit wun. Disse stroke was bedoeld veur de legere gruuntes zoas spinazie en bonen. Veuran zoln de jappel ,wortels en uien komn.

Nao ut spitten zol der noe compost opkom. Andere jaoren kwaamp der ait peerdemest op, want det konne zat kriegn van zien zeune die un peerdestal hef. De kerl had zelf met un anhanger a compost oppehaalt en wol de anhanger glieke naost die achterste stroke gond zetten. Zo hai de compost mooi dichtbie um dan op die stroke te gooien. De anhanger zat kats vol en veur die stroke hak niet zo heel veule neudig. Toenk genog op die stroke egooit had wolle weer achteruut um de anhanger veuran te zetten veur de rest van de gruuntetuun. Hij stond met zien spul op ut bouwland dus acheruut wol nie meer. Hij zat noe kats vaste. Gelukkig ston mien auto buuten ut bouwland en konk met un sleptouw hem helpen achteruut te jaagn vant bouwland of. Acheraf bekeken hadde de anhanger acherwaarts opt bouwland mun rieden, zodet zien auto buuten ut bouwland bleef. Dan hadde zichzelf kun redden. Maar achteraf ist malkeluk zegn hoet mut. Mar de compost ister noe toch oppekom en zelfs de vrogge jappel zit der in.

Ton