DALFSEN – Meert, dialectmoand: de internet bakker?? Ik kwame laast een keer deur het dorp hen, stund doar een auto met een grote sticker op de deure met doarop de tekst “de internet bakker”. Doar had ik nog nooit van e-heurd. Vrogger haj Herman van de bakker, (In Lenthe Hein van de bakker) die kwaamp met zo’n gruun Volkswaag’n bussie het griesbrood bi-j oons breng’n een paar moal in de wekke.
En doarveur, mar det weet ik al nie meer, want zo old bin ik noe ok nog weer niet, kwamen ze met een fietse met een grote maande veurop en soms ok nog weh achterop, of zelfs met een bakfietse vol met stoete.
Mar teeg’nwoardig giet det bliekbaar via de digitale snelweg.
Ik vermoedde dej dan een printer bie huus mutten hebbe’n stoan, en via de website van die internet bakker een mooi plaatie van een brood uutzuukt en die dan thuus 3-D uutprint?
Joa, techniek stiet veur niks teeg’nwoardig…
Hoe zol det met soep goan trouwens? Zal wel een mooi gesmeer word’n dan. Ik zie mie al al die vermecelli uutprinten.
Zommertied:
De tied is verzet en doar mut ik altied machtig an wenn’n.
Mien bioritme is dan een paar daag’n kats van slag en wat mi-j betreft magt ze direkt stopp’n met die zommer- en wintertied.
Wat wel mooi is, is det ut noe ‘soamds mooi lange licht is en kunn wi-j nog mooi wat in de tuun knooi’n of wat aans doen buut’n.
Ok was het ofgelopen zundag prachtig mooi weer um lange buut’n te zitt’n.
De meeste luu bint al weer druk met de tuun gangs um te bemesten, onkruud vothaal’n enzovoort.
En de vogels hebt ut veurjoar ok al in de kop en bint al druk an’t nestel’n.
Wel hoap ik det der nog een keer een bui-je reeg’n kump, want anders giet het zo stoev’n as de boer’n het laand goat ploeg’n en eggen.
Hebt jullie ok zo genoot’n van Meert, dialectmoand?
Der was ok van alles te beleaven in de bieb, op radio, tillevisie en ok hier op Dalfsennet waren der weer prachtige inzendingen van diverse personen.
Het dialect begint hier onder Dalfsen gelukkig steeds meer te leav’n.
Geweldig! De moand die vleug veurbie en dit is al weer mien laaste stukkie, wat ik wil eindigen met een kort gedichie:
Meert, de moand van het dialect.
In oen moerstaal verstoa ie mekare direct.
Mar as meert veurbi-j is, mag ie dan nie meer plat proat’n?
Natuurlijk, wel: Ik kan’t in ieder geval niet loat’n.
Weas trots op oen afkomst en moerstaal
Want zonder det is ut leav’n wel heel kaal
Mar ok belangriek det ze oe in het westen kunt verstoan.
Doarum hek mi-jzelf ooit es een cursus Nederlands kado edoan.
En natuurluk heb ik dan een gigantisch accent.
Mar det gef niks; doar bint ze doar ondertussen wel an e-wend.
Gegroet,
Hendrik van de Steege