Ie wurd mangs veur de gek ehaoln

Ie wurd mangs veur de gek ehaoln

LEMELERVELD – Der bint van die daagn dej kunt weetn dej bedonderd wurd. Zo is 1 april zo’n dag det iederiene uut mut kieken of ze gin geintie met oe ant uuthaaln bint. Ik dache ok un keer grappig te ween. Bie relaties muj mekare uutprobeern in hoeverre jullie geveul veur humor bie mekare past.

Want as iemand leuk wul doen mut ut wel waardeert wun, aans kriegie allenig mar trammelant. Dan ist ok tied um op te stappen. Int verleden hak un relatie met un deerntie. Op 31 maart waarn wiele saoms ant afscheid nem, zodet zie bie heur eign huus kon bliem  en ikke nor mien eign huus tot de volgende dag. Ik dache eem un geintie uut te haaln toen ik zaage hoe late ast al was. Twas al nao twaalefun en de volgende dag was a begun. Ik zei teegn det deerntie dek ut uut wol maakn. Ut meisie was verbaast, want ut leuo best wel lekker. Zie vreug mie dan ok: “Weurumme dan?” Ik zei daorop:”Kiek ut is noe a bienao ien uur en dus ist noe 1 april. Ie binter mooi inne trapt. Ha ha.”

Zie wurn kwaod en zei: “Dat soort gientjes haal je met mij niet uut, dus ajuu.”  Zo kwaam ik der achter det mien humor niet goed uutpakn. Toch mooi dekter op tied bin achter ekom. Noe konk weer verdan.

Ton

Artikel delen: