LEMELERVELD – Ut kan dei an mooie planties kunt kom. Dur is zo’n stekkiesmarkt, die ehaoln wurd deur tuunliefhebbers. Dan gunt ze andern ok ut plezier um mooi goedkoop en makkeluk an andere planties te kom. Ie hoeft zelf niks met te nem, mar dan hei ok niks um te ruiln.  Assie an komt zakkn met leuge handen, kump det niet zo gunstig over dan wanneer ie wat bie ie hebt zo dei wat terugge kunt doen.

Dus ik dache bie mie zelf um dan mar ens in de berm planties die daor gruuit uit de grond te roppen en die dan mee te nem nor stekkiesmarkt  zo dei tenminnste wat bie oe hebt um te ruiln.

Assie dan zegt det allenig mar wilde planten bint, kuj daor un hele discussie over hem det oen planties ok zeldzaam bint en ok det die un kans mun hem um iemands tuun op te fleuren. Oj geleuft wurd, dutter nie toe, ai mar iets hebt um te ruiln. As de andere tuinliefhebbers ut der veur over hebt kom ie toch an andere planties.  Noe mut niet iederiene metiene de berm allemaol gon leug haaln, want dan blefter niks meer over vant bermbleuisel. Dur wurd noe a minder uspuit in die berm um ut allemaol beter te laoten gruujen.  As iederiene noe spul veur de stekkiesmarkt druut giet roppen, kriej nog gin mooie begruuide berm meer.

Ton