LEMELERVELD – Iemand had un bult takkenpruttel achter in de tuun zitten. Umdet ut paosvuur in Hoonhorst vreug umme brandholt, koj det daor veur niks nor toe brengn. Die bult holt koj daor in de tuun ok un tied laoten zitn en wachten det un keer zol verrotten, mar det duurt dan wel un posie. Better wast um noe die bult nor ut paosvuur te brengn.
Dus moster un anhanger eregelt wurn en dan konk die op de oprit zetn um ut holt dan daor nor toe te slepn. Ak die anhanger veur ut huus zol laoten staon, zok un machtig ende met det holt mun slepn. Mar weurum meuluk doen ak ut ok dichterbie kon opladen. Op de oprit stond echter noe un auto en det was zo’n hybride geval. Der was al meer dan un maond nie meer in ereden. Dus de accu was kats leug. Umdet der noe gin stroom meer was, koj de versnelling ok nie meer vrij zetn. Noe konk die auto ok nie meer van de oprit ofduwn. As det kon, konk nog overstarten bie un andere auto met van die startkabels. Ik had ok gin startkabels bie mie van tig meter lang en dus moster un garageboer kom um te helpen. Dus eem wachten tutdet de garageboer tiet hef. Toen de auto weer leup, gaf de garageboer ut advies um toch un half uurtie rond te toern um de accu zo bie te laden. Met die tip nam de garageboer weer afscheid, want hij had nog meer te doen. Toen de auto estart wurn, heuren ie de motor loopn en det was dus de benzinemotor. Ik mosse nog eem wat pakn en leup weer nor die auto, mar
ik heurde niks meer en dache det de auto a weer uut was egaone. Ik stapte in de auto en zag op ut daschboard nog allerlei lampies branden. Ok de versnelling konk verplaatsen
Toen bedach ik mie iniens: o ja noe leup de auto electrisch en det heur ie nie. Met un zucht van verlichting konk noe begin met de oplaadrit. Ak binnen had mun zegn det de auto a weer uut egaone was, zol de eigenaresse helemaol overstuur ewun ween.
Toenk weer terugge kwaam van de oplaadrit konk die auto veut ut huus neerzetn, zodet de oprit vrij bleef. De anhanger kon noe op de oprit en de holtpruttel konk opladen. Toen det trechte was kon de hybride auto weer op de oprit met de bedoeling um noe af en tie un entie te gon rondjaagn um de accu bie te laden. Noe konk die takkenpruttel noar ut paosvuur in Hoonhorst breng. Un weeke eerder koj met de auto en anhanger niet dichte genog derbie kom, umder ut toen strontnat was en dan zoj ut land kats kapotrien. Noe stonter un man of wat en zie hulpen mien netties met lossen, daor hak ok kats gin werk mee. Toch wel netties van die luu.
Ton