LEMELERVELD – Un kerl hef un koppel kippen en dan kriege ok eier. Ik mosse die kippen voern en de eier uuthaaln. Hij gaf mie un plastic buul um die eier dan in te doen. Het voern mos a un bettie klungelig, want der was helemaol gin goeie bak um ut voer op te scheppen.  Ut mos gebeurn met un bord waor ok nog un stuk uut was. Mar ai mar vake genog un bettie kon opscheppen kreej vanzelf genog.

De kippen haan  honger, want ze waarn un paar daagn vergetten te voeren.  Nao ut voeren konk zien detter nog genog water was en konk de eier bie mekare zuukn.

In de plastic buul hek toen de eier op de achterbanke van de auto neer elegt. Op de achterbanke lag nog meer pruttel en ik legn de eier zo det ze der niet af kon roln. Later bie huus wok die eier uut de auto haaln en deut de achterdeure lus.

Det hak better nie kun doen, want die buul met eier lag teegn die deure an.  Met dek die deure lus deed kwam die buul met eier met de tuute nor beneden der uut roln. Ik greep de buul, mar toch kwaam der wat eier op de grond trechte.

De meesten bleem in de buul en de kerl bie mie in de auto zag det gebeurn en begon machting te vleuken dek toch wise der die eier daor op de achterbanke lang en det ik dan zo stom waase um dan die achterdeure lus te doen. Deur det gevluuk wurd die eier ik nie weer heel.  Ik had die eier better vanaf de veurbanke mun pakn. Ik bedache mie dek al is eerder zoiets mee emaakt hadde en toen hak ok un eierdeusie mun pakn. Zo’n plastic buul is ok nie  ait slim.

Ton