Ak det eerder eweetn hadde - Foto: Ton S
Foto: Ton S

 Ak det eerder eweetn hadde

LEMELERVELD – Tis ait wel leuk um saoms met menare un koppie koffue te drinken. Teegn de aomd an mutter dan koffie ezet wurn. Dur bint noe van die apparaten veur, waor assie dan zo’n cuppie met koffieboon daorin mut doen. Op un knuppie drukken en aster genog water inzit, dan lup ut water vanzelf op ut cuppie en kriegie koffie in ut koppie det der dan onder mut staon.

 

Ik ben nog veur de olde manier van koffie zetn. Dan muj water kokken en  opgieten bie un filter waor de koffieboon al in zit. Ast deur eleupn is kuj de koppies vol gooin. Mangs mut der nog melk of suuker bie in. As de koffie dan der niet goed uutzut, denkie a gauw det de melk zoer is. Ie gooit de koppies weer weg en ropt un nieuw flessie met melk uut de kaste. As de koffie dan nogges der nie goed uutzut, goi is eem vraogn watter met de koffiekanne is gebeurt. Dan kriej te heuren detter azien in edaone is um de kanne goed schone te kriegn. Ak det van te veuren hadde weetn hak de kanne goed mun ummespeuln. Ik had de koffie noe eerder klaor kun hem. Tis ait nog zo ait alles eerder weet, kump det vake better uut.

 

Ton

 

Artikel delen: