LEMELERVELD – Ie heurn over Schiphol wilde verhaaln. De bagageluu zollen staken en meer geld wuln beurn. Ok zolder veuls te weinig personeel  ween bie ut inchecken. De balies die daorveur waarn, daor zat mangs helemaol gin volk. As de luu die der wel waarn dan trammelant haan met un passagier, kon ze ok niet zegn det ze dan mar ens anders hen mossen gaon.

Der was niet un ens aans. De passagiers mossen deurum machtig lange wachten en tis ok gebeurt det ze te lange haan mun wachten en ut vliegtuug a vort was met oen koffers der wel in. Die koffers hebt gin paspoort of vaccinatiebewies neudig en kon wel ut vliegtuug in. Ik hadde un reisie boekt naor Canada met mien beide zeuns. Ientie van hun hef un handicap en dus hek extra begeleiding anne vraogt en det was goed bekeken. Wiele mossen ons melden bie de balie veur extra begeleiding en zie naam ons mee overal langs henne. Der ston luu a meer dan twee uur te wachten en die mossen oons der langs laoten gaon. Die luu von det niet echt leuk en woln oons wel anvleign. De begeleiders wussen allerlei foefies en binnen weggeties zo det wiele nens in de rije hoem te staon. Dus veur oons veult allemaol hardstikke mee. Mar biet inchecken gin ut toch nog mis. Veur un visum mossie allerlei gegevens inlevern en daor was un fout emaakt deur mie. De visumanvraog veur ien van mien zeuns wol nie en mos noe opnieuw. Det kon niet meer op tied veur de geplande vlucht en noe mossen wie un dag later. Metiene weer op huus an en mein vrouwe zei bie thuuskomst: “Det was un kurte vakantie of niet dan.” De volgende dag verleup prima ok weer deur die begeleiding. Die waster nie veur niks.

Ton