LEMELERVELD – Ik waase lest bie iemand die un eign planning had. Doar wolle niet van ofwiekn en dus was ik veuls te vrog biet mense. Ik zolle wat gon doen biet mense, mat det was anderhalf uur later..Wat wiele woln gon doen daor waarn weer andere mense bie betrukken en as wiele dan veul eerder an kwaam zakken kon det wellis niet goed uutkom.

Ik konne noe mien tiet uut bliem zitn of wat aans doen um de tiet te vuln. Ut mense had un tuun en daor konk mie wel un bettie vermaakn. De staoten ston vol met onkruud en ik had al een iezeren scheppie vun in de schuure. Toenk met det scheppie onkruud ant wegsteken was, kreek te heuren detter ok wel un onkruudkrabber was. Dus ikke verder met die onkruudkrabber wat veule better wol. Toenk un bult onkruud uut de straote had lus eknooit, wol ik de boel ankeern. Mar ut mense had gin bezem in huus, dur was wel un stoffer en blik. Ik waase a begun met un harke en noe kuj denken dek gek ewun bin, mar ai de harke umme dreit kuj met de achterkante un bult van det lusgekrabde onkruud meekriegn. Ut zand blef dan wel lign en toen wiele eem bin waarn veur un kuppie koffie zag ik de stofzuuger staon. Ik zei toen dek met die stofzuuger de straote buutn wel better kon schoone kriegn

Ut mense vleug mie bienao an um die mooie stofzuuger in de tuun te gon gebruukn, die was allenig mar veur bin en aans nie. Ik begreep wat ut mense noe dacht en legn uut dek niet de stofzuuger zelf mar de stange met de burstel deran. Daor konk mooi ut zand mee opkeern en dan koi de burstel dan weer schoonemaakn. Daor had ut mense niet zo gauw anne dacht. Dus zie zag noe in det de stofzuugerstange met burstels ok goed as bezem gebruukt kon wun. Toch de straote mooi trechte ondanks ut gebrek an goeie spuln. Ut mense hef noe eleert um spuln die al hebt mangs ok aans kunt gebruukn.

Ton