LEMELERVELD – Utkump veur det iemand veur iets anne zeene wurd en de vraoge is dan weurumme dan. Ai mangs ant opruum bint en ie komt un hele bult glaswerk teegn, dan mut det offe voert wurn. As iemand det dan giet doen, kujum glasomaan nuum. Ut kan det as iemand int verleden vanuut cafees allerlei bierglaasn metnam, umdette daor ok veur had betaald.

Ut bier was zo machtig duur dut ut glas der wel bie betaald mos ween. Die glaasn kon mooi bie de uutzet en ai bie hum kwaam, krej oen bier in die glaasn zodej zaagn det ut glaasn met un verhaal waarn. Souvernirs koit ok nuum. Asse oe dan glasomaan nuumt mak det gin zak uut, want die komt bie de glasbak mekare toch weer teegn. Bie de glascontainer is noe de vraoge weurumme der allenig van de kleine gaatn inzit. Wat muj met grote glaasn potten of schaaln, die past never nooit niet in die gaatn. Muj die dan kapotgooin zodet ze wel past? Ai dan de glassplinters wult opraapn kuj oen jatten ok nog kapotsnieden. As der dan gin ehbogeval in de buurte is loopie daor te bloeden en kuj ok weer andern ansteekn met allerlei appartigheid. En ai de grote stukn dan kapotsodemietert kriej ok weer un bende bie de glascontainer,  un stoffer en blik zuj allicht niet bie oe hem.

Ie wult a goed meedoen veur ut milieu deur oen afval goed te scheiden, mar dan muj weer zo’n prut bie de glascontainer achterlaoten. De grote glaasn gevaln daor kuj niks mee.

Ton