LEMELERVELD – Vrömd volk zol d’r zo an vebie gaon as ie nie wössen dat daor een prachtige singel sparren en dennenbomen jao een paradijs veur allerlei vogels, eekhoorns en ander diergrut te vinden was. Völle jonk en wat older volk ko’n zich hier achter dissen singel onmeunig vermaken.
Waor met, sol ie oe ofvraong, nou in een diep gegraven zandgat dat de luu in loop van de tied zwembad nuumd wön. Karrevrachten zand bint van hier uut gebruukt veur aanleg van de Dorpstraote. Veur de hane s’mons krein en de maone zich de slaop uut de oog’n wreef gebeurn dat’r luu – vrog uut de veern- hier alle rust en ruumte veur zich zelf op eissten. Dwaalpachies waorin wie vermaak zöggen um naar paddestoeln en kabouters te zuken Det gleuf ie toch wel. Zuk biezonder volk is in de massa op e gaon, Hun huusies bint’er nog wel, s`aoms zit te bakkelein en piepie te roken, jao echt, gao maar kieken. Zie hebt een eigen onzichtbare wereld, onze olde generatie gleuft er wel in………….ja wie hebt er zelf met e praot. Twee holten gebouwchies met zes niet al te grote ruumtes om te verkleden maar wel vol met loergaatjes, jao um de andere kunne te begluren. Nee wie waarn nie sukke lieverties, va en moe han ons wel ordentelijk groot e brach, maar koe`n bint ok kalver e wes. Um alle zaand of te spuuln um naor huus te gaon was er een douche jao echt, een grote bak op paolen waor stienkold water uut de grond in ‘e pompt wön.
Um te moog’n zwem mossen wie wel een zilveren duppie an de badmeester in det witte huusie geem en veur de hele wekke een mooie ronde gulden met het randopschrift
“God zij met ons”
Vaak onder puntdraod deur, jao stiekem zwem in onze onderbroek, nou en…Net doen of één van ons niet zwem kon en de badmeester met als enig reddingsmiddel – – een lange stok met een haak – op kwam draven. In vele beukenbomen die deze omgeving rijk was( zie foto) sneden wij elkaars initialen als belofte van eeuwige liefde en trouw, emotie’s vleung’n ok toen al deur het hoge geboomte. As die tied kon vertel’n, bie van Haast onder de pompe um het bloed van schaafwonden of te speuln. Willem en zien seune Jan van Haast, zie bint al lang uut de tied e kom, in onze herinneringen leef ze voort in de foto van hun boerderietje.
Vele vrienden en vriendinnen in een korte episode van jeugd en pekelzonde, tijdgenoten van …..
nog êêm achterumme kieke’n
Historische Werkgroep Lemelerveld
Juni 2022.
H.Huisman.
Foto’s komen wat later.
