LEMELERVELD – Tja, wielewurd allemaol older ast goed is. Det kan mooi ween, mar ut kan ok minder mooi ween. Biet older wun kuj sommige ding niet zo goed meer doen en ait toch blieft doen kuj der mangs klachten an over haoln. As ut lief ok nog allerlei kuurn giet geem, dan ist helemaol waardeloos.
Soms kant zo wun dej niet kunt bliem woon in oen eign huusie. Aster plaatse is goi dan ens aans woon, waor ie meer hulpe kunt kriegn. Ai in oen eign huusie klussies mun doen die niet meer kunt, muj zien dei der iemand bie ziet te vin die det veur oe kan doen. Dan kuj mooi bliem woon op oen eign plekkie. Ie mun wel probeern um zelf zoveul ding te bliem doen diej nog kunt, dan hej mooi wat te doen. Ut hoeft allemaol niet met gank, ie hebter tiet zat veur. Mar ast niet wul muj ok helpe durm te vraogn. Tis gin schaande. Ut kan ok zo ween dej deur die hulpe weer is un keer volk over de vloere kriegt. Dan mut oe die hulpe wel anstaon, aans kujum better buutn de deure haoln. Ie bint ait nog baas in eign huus. Ut kan ok zo ween det de hulpe ok al is eerder bie un zuster van oe wes is. Ie kunt dan menare mooi op de hoogte haoln hoe offie die hulpe ut beste kunt aofkraakn. Ie kunt de hulpe ok waarschuwn det oen zuster hele verhaaln over de hulpe had te verteln. Dus dan muj mar aofwachten of de klussies wel naor tevredenheid zult gebeurn. Ie mutter mar van uut gaon det allemaol mooi en netties zal gebeurn. De hulpe kregter voldoening deur asse oe mag helpn. Asse dan zut dei der tevrene mee bint kumput mooi trechte.
Ton