LEMELERVELD – Een bijenboer wol graag zien bijenkassen weer bie huus hem, zodette dermee an de slag kon en ant honingslingern. Die bijenkassen ston helemaol in Nijmegen. Um un uur of zesse knupn hij de anhanger achter de auto en gink der naor toe.  Hij vreug mie ok eem mee wol gaon. Um   allenig al die kassen op te laden zol un heel gedoe wurn.

Wiele kwaam daor an in Nijmegen en teegn de avond an gaot de bijen vake terugge in de kas. As ut kolder wurd gaot ze ok rapper terugge. Mar noe was der un mooi zunnegie en der vleugn nog un bult bijen rond bie die kassen  Det zol dus afwachten wurn tetdet die bijen zo’n bettie in de kassen waarn.  Intussen kwaam de eigenaar van het terrein bie oons en vreug of wiele dan un kuppie koffie woln. Wiele mossen toch wachten dus det kwaamp oons mooi uut. Toen de kassen dichte kon, zaagn wiele det de iene kas niet goed derbie stond en vandaor kon de bijen die derinne vleugn waarn achteran der zo weer uut. Die kassen bint op mekare stapelt net as bie Ikea en as det allemaol goed isse daone kuj ut jleppie van het vlieggat dichte doen

Dan un sjorbandje der umme hen en ie kunt ut spul opladen.  Bienao alle kassen waarn oppeladen, mar die iene die niet goed oppestapelt was daor kwaam un bulte bijen die der nog niet inbliem. Wiele haan allenbeide wel van die pakken an, mar ai zo’n bult bijen umme oe hen kriegt kunt der ait wel un paar bijen gaagies vin deur ut pak henne en wuj weer usteuken. Ie kunt dan met un hellige kop de boel de boel laoten en dermee kappen, mar ie bint niet veur niks helemaol nor Nijmegen egaonne. Toch mar eem deurpakken en ondanks die rondvliegende bijen de boel.opladen, zodej  op huus an kunt. Volgens de bijenboer, die ok al vaker steuken is, ist allenig mar gezond. Ik denke bie mie zelf det ut ok wel weer overgiet. Ik heb noe allenig mar un dikke hand.  Twas a elf uur saoms toen wiele terugge waarn en mos de anhanger ok nog leug ehaalt wurn. De bijen bint weer thuis en dus missie geslaagd.

Ton