LEMELERVELD – Mangs hei van die ding diej op det moment nie echt neudig hebt. Ai ut wel neudig hebt muj weetn waor of ut noe ebleem is. Ai in bonke spuln hebt kant zo ween dej niet meer weet waor alles ligt.

Mangs kant ok nog zo ween det iets un bettie kapot is en ie wult der later wel nor kieken en gooit ut eem achteruut. Ai ut noe neudig hebt en ie denkt te weetn dei ut ooit achteruut egooit hebt goi overal ant zuukn oit terugge kunt vin. Ai dan al un tietie loopt te zeuken goi toch twiefeln oit niet al weggedaone hebt met de gedachte: vort der met.  Dan ie bint ut gewoon kwiet. Ok biet opruum muj goed oppassen deu niet teveule wegmietert.

Un mense mut genog etten en drinken um ut vol te haoln. Met name drinkn muj genog doen, veural ast buutn nogal warm is.  Ie kunt flessies water meenem, mar der bint ok van die bidons die nie gauw kapotgaot en diej  makkeluk mee kunt nem. Ai bie oe in huus al meer van die bidons hebt muj oppassen as iemand ant opruum giet en dan iniens bint der doppen van die bidons pleiten. Dan hebbie bidons zonder dop en daor hei gin zak an. Ie mun dan rap achter un bidon an met un dop derop, aans kriegie ok nog dust en hebbie gin drinkn bie oe en det mut nie gebeurn.

Ton