Mangs kump ut teggelieke

LEMELERVELD – Un kerl die un lappe gruuntetuun hef, zei mie det ik wel un stukkie van zien jappel mog rooien en die met nor huus nem. Hij en zien vrouwe bint de ienegen, die al die gruunte en jappel mun opmaakn. Deurum konne der wel wat van missen. Ikke die bult jappel mee nor huus um die indertiet op te maakn.

 

Mien vrouwe zei bie ut zien van al die jappel det de jappel in mien eign tuun ok al zo’n bettie riepe waarn.  Ik had un keer wat potjappel over, toenk bie iemand jappel mos poten en dache toen detter in mien eign tuun nog wel un bettie ruumte veur was te vin um die potjappel daor in te poten. Dus die jappel konk noe a rooien en hek voorlopig meer dan genog jappel. Ik kan der wel wat weggeem, mar dan muj eerst liefhebbers veur zien te vin. Ik kan der ok mee op de merkt gaon staon, mar dan kompter allerlei regelties waor assie dan rekening mee mut haoln. En soms kompter zelfs kosten bie um daor te moogn staon en dan hek toch weer te weinig jappel um ut leuk te laoten ween.

 

Ton

Artikel delen: