Andern de schuld geem is wel zo makkeluk

LEMELERVELD – Ik waase iemand ant helpn biet eerappel rooien. Ja zegge trots,  ik zal wel de eerste ween die zien eerappel dral uut hef. Ut was ok mar un klein stukkie van zien gruuntetuun, dus dan kant al rap zo ween. Noast die gruuntetuun lag un stuk bouwland waor as noe graan stond te gruujen.

 

Eerder was ik daor  al met die man bezig ewes um onkruud weg te haaln. Toen zei hij mie det ut onkruud wat ik der uut ehaalt hadde,  wel an de rand van der bouwland mog neer gooin. Ut lag dan wel int graan mar det mog gin bezwaor ween dach hij. Toen wiele noe bezig waarn met jappel rooien, kwaam de boer van wie det graan was, eem kieken hoe ut met zien graan was. Hij zag toen die bult onkruud in zien graan lign. Hij vreug ons wat daorvan de bedoeling was. Hij keek mie en toen de man van de gruuntetuun an en wachen op ut antwoord. De man van de gruuntetuun zei det hij ut nie edaone had. Dus toen bleef ik over, want ik had ut edaone in zien opdracht.  Ik zei teegn die boer dek ut der zo weer zol uuthaaln en beut mien verontschuldiging an. Ik wol niet metiene gon wiezen nor de echte dader, want die zol ik later wel eem de oorn wassen. De boer zei det ut niet zo’n ramp was ast mar weggehaald wurn. Later konk mie nog net inhaoln um die man van de gruuntetuun niet in mekare te ram en ik vreug um weurum ikke der veur mos opdreien det ik van hem die onkruudbende op ut bouwland int graan mos gooien. Hij dacht det ut niet zo gauw zol opvaln. Ik heb de onkruudpruttel der uut ehaalt, dus det zol noe gin probleem meer oplevern. De eerappel bint der uut, tis weer ummespit en der stiet ok al weer nieuwe gruunte in. Ik zei nog teegn de man van de gruuntetuun dek int vervolg mar nie meer van alles op ut bouwland mos gon mietern in zien opdracht,  want dan kreege trammelant  met de boer en hij hoeft zich nie meer achter mie te verscheuln. Un klein kind zol det doen mar zo’n kerl van al meer as 80 jaor mos zich schaam daorveur.

 

Ton

 

Artikel delen: