LEMELERVELD – Kwaase pas bie enkele luu ant koffiedrinkn. Die luu woont buutenaof en op un gegeem moment, saagn wiele det de buurman op de boederije achter un kalf ant ren was. Ut kalf was hum ontsnapt en leup ut weiland in waor as hekn um henne ston. Die buurman wol ut kalf inhaaln um ut zo in de kladden te griepen.

Ut kalf leup veul harder en dach det die boer hum zo nooit zol kriegn. Ut kalf wol ok wel is eem buuten ut weiland kieken en kreup deur de afrastering en kwaamp zo in un dreuge sloot trechte.  Ut stuiterde aorig op de platte bek en toen ut weer in de biene kwaamp bedache zich watte noe wol gon doen. Toch mar eem verder kieken watter nog te beleem veult en ut kreup uut de sloot en kwaamp op de harde weg uut waor as de auto’s gewoon verdan reen. Die automobilisten vun ut dus helemaol nie erg um un kalf op de motorkappe te kriegn. Ut kalf dach zelf um nie aof te wachten tutdet un auto hum veur de baste zol rien en gunk de weg over um an de andere kante ut bos in te goon. Daor kwaampe gaas em prikkeldraod teegn. Umdet wiele det gedoe bie de buurman zaagn, bint wiele hum eem gon helpn. Veural toen ut kalf de weg opleup woln wiele auto’s teegn gon haoln, mar ut gin zo rap det ut kalf al in de bos veur ut gaas stond te loern. Met un paar man kon ut kalf toen a gauw in de kladden ugreepn wurn. Twas un aorig entie vanaf de boerderije en um dan det kalf an de pootn daorhen te draagn zol wel eem duurn. Mar de luu van de boerderije zeiden det hun va der zo zol ankommen met un veekaore um ut kalf op te haaln. Toen de boer deran kwaamp zeiden wiele det rustig koffiedrinkn met zukke buurn der nie meeer inzat. De boer zei daorop det wiele de hele dag al ant koffiedrinkn warn en um eem achter un kalf an te vang gezonder was.

Ton