LEMELERVELD – Ik mogge eem weer helpen bie un kerl die ok naost zien gruuntetuun ok bijen hef. Ik ben der a vaker  ewes en ben ok al vaker deur die bijen esteukn. Twas mooi weer dus ik leupe in korte bokse en t-shirt. Ik dache nog um un overal mee te nem, mar ja kats vergetten.

Toen ik bie die kerl ant huus kwaame zeie det wiele noe allenig mar in de gruuntetuun bezig zoln ween. Dam zol ik de overal nie missen um bije steken te veurkom. Hij had nog un stukkie gruuntetuun over um nog meer gruunte in te doen.  Ik zeie die kerl dette genog gruunte had veur un compleet weeshuus. ” Ach de kinder van mie nemt mangs wat mee en ik hebter mooi wat bezigheid an” zeie daorop.

Toen ut onkruud der uute haalt was konk de boel mooi anharken naost de gruunte die der a mooi boven stond. De kerl kump kieken hoeverre ik a ware en schelden mie de huid vol dek un rijgie bieten umme schoffelt had. Tja ik zei um dette daor dan un kaartie had mun bie zetten, want ik kon toch ok niet roeken det hij daor un rijge bieten ezeit had. Nouja hij had nog wel wat bietenzaad over en det kon der zo weer in. Toen det klaor was mossen wie toch weer eem nor zien bijen. Hij wol noe enkele raten in un bak doen en der dan un deksel op met daor weer un waterkoker boom op. Hij zei det met un slangegie stoom in die bak  kwaamp en dan zol die bijenwas vanzelf  vloeibaar wun un via un piepie onderan leup ut zo in un emmer. Der vleugn wel wat bijen rond mar daor haan wiele gin last van.  Det koken zol un tietie deurn dus waarn wiele gauw klaor dermee.

Ton