LEMELERVELD – Ai ant snoeien bint, kant gebeurn detter wat van de aofgeknipte pruttel blef lign ait opperuumt hebt. As iemand onmeunig netties is, det zelfs alle eikels van ut gazon ehaalt mut wurn, goj daor dan gewoon in mee en pakt un harke um dan ut gazon an te herken um zo al die eikels bie mekare te kriegn.

Det ut nog gin herfst is en der noe al un bult eikels valt, hult wel in dei nog wel un tietie eikels kunt bliem opraapn. Ai ut gazon gaot meien kompter ok wel wat van de eikels in de grasbak trechte, mar lang nie alles. Sproeien muj noe niet teveule doen aans binter luu die daor de pineut van wurdt. De scheepvaart hef last van leeg water in de vaarroutes en kunt noe veul minder metnem umdet ze aans vaste komt te zitn. Um de tuun mooi te haoln muj ant sproeien, mar ie mun zelf bekieken wat belangrijker is. As iemand un viever in de tuun hef en die viever is kats begruuit met riet dan muj det riet weghaaln um nog te kun zien det un viever is ant ut water watter nog in stiet weer kunt zien.

Aster un bonke boom in oen tuun staot zuj die mangs mun bie knipn, aans gruuit ut spul kats dichte. Die boom gruuit steeds hoger, dus ai nog van oe aof wult bliem kieken muj der wat an doen. Ait bienao altied allenig wult doen en ie kriegt mangs hulpe, mut die hulpe ut wel net zo doen zoas ie ut zelf ait doet, aans muj der ok nog weer achteran um ut te kriegn zoas ie ut wult. Die hulpe muj dan ok nog onmeunig gaon ofbekn det de hulpe weer waardeloos was en ie allenig hebt loopn op te vretten en der ok nog weer achteran mossen um ut zo te maakn zoas ie ut woln hem. De hulpe die de konte volle eschulden kreg kan daorop zegn dei ut dan mar zelf mun doen en kan dan gon loopn. Ut kan ok aans. As ieder in giet zien det un ander aans is met opruum dan zuj nie zo gauw hellig op menare wurn en kant saam werkn prettiger wurn.  Ast werk derop zit en ie laot mekare weetn det ut noe der mooi opzit en ut goed verloopn is geef ie menare toch nog un goed geveul.

Ton