LEMELERVELD – Un vrouwe hef un tuun met daornaost un inrit naor un weiland van un boer. De relatie met die boer is niet echt prettig. Der lup un sloot op de grens van heur tuun en det weiland.  Ut mense hef ooit iemand der bie ehaalt um de kadasterpaolen uut te meetn. De boer dut daor nie veule op uut en hef de halve sloot a dichtegooit en giet dan klaagn det de vrouwe heur tuunpruttel better mut snoeien, umdet ut allemaol overhsngt op zien weiland.

De vrouwe wol eerst op de grens alles dichte pakn met snoeiholt, zodet ze meer privacy hef en gin geloer meer van die boer. De vrouwe hef in heur tuun ok un hottub staon en ik zei al is teegn die vrouwe uut gekkigheid det ze met mooi weer mar meer in heur hottub mut gaon plumpen, dan kump die boer misschien ok nog op de koffie. Ut mense is al in de tachtig en zei daorop det hij dan zien  oogn mooi kon verpesten an wellustige blikken.

Mar hef se heurt det die boer un labdgoed wol maakn en de entree kump dan langs heur tuun via die inrit van hem. Noe wul ze meer uutzicht op ut weiland, dus alle pruttel op de grens mos weer weg. Misschien mut de hottub ok nog verplaatst wurn, want aster wat te bekieken is kumpter ok meer volk.

Ton