Krap an volk te vin - Foto: Ton S
Foto: Ton S

Krap an volk te vin

LEMELERVELD  – Noe hebt veul bedriem meute um genog personeel te vin. Kwaase bie iemand die plannen hef um heur huus te verkoopn.  Deurumme wul ze de boel eem netties opknapn en soms un likkie verve dran smeern. Schilders hebt heel geen tied en kunt mangs pas volgend jaor komn.

Ik zei dek wellus un verfkwaste in de haane heb ehad. Ut mense zol der heel blij umme ween ak ut wol doen. Ik waarschuwde heur metiene dek allenig mar un knooier bin en det ze echt gien vakwerk mut gaon verwachten.  De mogelukke koper kon wellis as de sootermieter aoftaaien as die mien schilderwerk zol zien. Det zol volgens ut mense wel meevaln ak bie mien eign huus ok mangs wat ging verven.  Ut zol ait better liekn as de kake plekn die noe  op sommige plankn an  heur huus zaten.  Ik wil ut mense wel helpn um de aofbladderende verve weg te krabben en dan naoschuurn.  De nieuwe verve deran opsmeern of opstrijken en as det un bettie mooier stiet hef ut mense minder zurge an de kop. De tuun is ok anne pakt deur vakluu, die ze dur ok meuluk bie kon kriegn. Umdet bepaalde bedriem niet genog personeel kint vin, kunt die vake niet metiene komn en duurt ut soms lange veurdet ze tiet veur oe hebt. Umdet ze genog vraoge hebt kunt ze ok duurder wurn. Jonge mensen laot zich meestal niet opleiden veur werk wat oe an de botten kump. Zo kriegt mensen die det werk wel doet steeds meer werk. Bedriem die graag meer personeel wult hem, verzint noe allerlei foefies um mensen over te haaln um bie hun te gaon werkn. As werknemer kuj noe eisen op taofel legn um bie wekgevers te koomn werken.

 

Ton

Artikel delen: