Ut mut nog wat wurn - Foto: Ton S
Foto: Ton S

Ut mut nog wat wurn

LEMELERVELD – Iemand had un olde muure staon, waor un stuk van weg was. Ik mosse de begruuing eem weghaaln um zo de stien weer zichtbaar te maakn. Dur lag allemaol grus en zand overheene en ak dur weer stien op wol metseln mos ik eerst zien waor ik op kon metseln.  De man had un half zakkie olde potland, wat al keihard ewurn was.

 

Ak det dan fien kon houwn konk ut misschien nog gebruukn um cement te maakn. Ik wolle un enkele muure maakn, mar bie ut spitn zag ik det ut hier un dubbele muure was. De muure hung al aorig achterover en det kon zo bliem ak dur dan zand achter teegn an zol maakn. In overleg mos ut wel weer un dubbele muure wurn. Twas noe de vraoge of dur genog stien zol ween um de hele muure weer op te metseln. De olde potland was ok bie lange niet genog en de man mos toch nog eem nor ut dorp en zol dan wat metnem. Dus hij kump weer terugge met un klein zakkie snelcement.  Det was lange niet genog en ik mosse veur de volgende keer zelf mar wat metnem, want hij hatter helemaol gin verstand van en det wolle zo haoln. De volgende keer hak zelf potland mettenum en konk de stien die hij had derop metseln.  Alle gaatn en scheurn in de muure konk noe dichte smeern en had veuls teweinig stien.  De man wol noe nog wat stiene dur bie zeukn en dan kon wiele zien ak dur nog wat van kon maakn.

Artikel delen: