LEMELERVELD – Ie kunt op allerlei maniern ant knooien ween. De iene keer ist ai ant prutsen bint umdei de echte hulpe niet durft te vraogn of umdet ut dan te duurt wurd. De andere keer ist as iemand allerjesus veule tied neudig hef um zien ding te doen. As andern dan op oe mun wachten, mut die niet  gaon dram en oe opjaagn. Dan kant mangs nog langer duurn.

Al vanaf de geboorte begint de race. Zo gauw mogeluk older wurn en ai old bint hei tied zat. Ik hebbe det zelf ok un bettie biet schriem van mien stukkies. Mangs stuur ik ut te snel in, want dan zie ik later allerlei fouten die dur nog instaot. Ak ut better had nao eleesn hak det kun verbettern. Wiele leeft noe in un tied det wiele ait ens druk mee bint. Iederiene hef gank in de konte en ut mut allemaol zo rap meugeluk. Tied um te wachten ister nie meer.  Is iets niet metiene te kriegn, dan gaot ze a rap ens aans kieken. As ze dan te maakn kriegt met andern die meer tied neudig hebt um hun ding te doen gaot ze zitten dram en dan vraog ik mie of weurumme dan?

Tis veur iederiene op dezelfee tied nieuwjaor hier. As iemand deur toestanden ut iniens rustiger an mut doen, zut die dan pas hoe jachtig de meesten leeft. Ze zegt toch ok hardlopers bint doodlopers. As iemand meer tied nemt, kanne ok nog is genieten vant leem. Ai as un stoomtrein deurt leem gaot, dan gieter un bult langs oe hen. Tis tied dei dur tied veur nemt.

Ton